ـ1ـ
تْرابْ الْبَيادِرْ كَبَّشْ بْدَيِّي
لا تْفِلّْ.. قَللّي.. وْدابْ حِنِّيِّه
وْصَارِت كْنِيسِه نْبِيدْها مَجْبُول
بْطُهْر الْقَدَاسِه.. تْصَلِّب عْلَيِّي
ـ2ـ
تْرَكْت الأَهْل.. مَعْقُول؟.. مُشْ مَعْقُولْ
أَحْباب.. صَفُّوا الْيَوْم خَبْرِيِّه
لا عْيُون فِيها تِقْشَعُن وِتْقُولْ:
بَلَّل صُورْكُن دَمْع عِينَيِّي
ـ3ـ
ما فِي بَسطْ مِن بَعدْكُن مَقْبُولْ
وْلا فِي مُوسيقَى تْهِزّ إِجْرَيّي
نِير الهَجرْ.. عَمْ جَرْجرُو عَ طُولْ
يا مِجدلَيَّا.. تْلطّفِي فِيِّي
طْلُوع الْفَجْر بِنْدُبْ إِبِنْ مَجْهُولْ
وْعِند الْمَسَا بِبْكِي عَلَى بَيِّي
**
