عيشة هنا في مجدليا

ـ1ـ

عِشْنا سْوِيِّه.. الْجارْ حَدّ الْجارْ

عِيشِةْ هَنَا.. عْلَوَّاهْ لَنُّو نْهارْ

إِرْجَع وْشُوفْ الْعَيْن.. الِكْنِيسِه

وْأَعْرِفْ بِبَيْت الْوَلْدَنِه شُو صَارْ

مشْتاقْ عَبِّي شْوَيّ بِـ كِيسِي

زَيْتُون.. حَبَّاتُو غْمار غْمارْ

يَا مجْدلَيَّا مْحَبّتِي قِيسِي

رَغْم الْهَنَا.. رَغْم الْغِنِى بِالهَجْرْ

الدَّمْع بْعُيُوني.. وِالْقَلْب عَ نارْ

ـ2ـ

عْلَوَّاهْ إِرْجَعْ شُوفْ أَحْبابي

يَلِّلي وْجُوهُنْ مِحْيِت غْيابي

ياما بْعَتْم دْفاتْري خِرْطَشْت

كَمْشِةْ أَسامِي.. رَدِّت شْبابي

وْياما وْياما عَ الصُّوَرْ فَتَّشْت

انْ ضَاعِتْ شِي صُورَه.. يِكْبَر عْذَابي

بْعادْ عَنِّي.. وْكِيفْ فِيِّي عِشْت

وْبَلَّش تْرَابي يِنْدَه تْرابي

خِتْيَرْت، شَعْرِي شَابْ، نِتْفِه طْرِشْت

يا مِجِدْلَيَّا خَفِّفِي مْصَابي

ـ3ـ

ما عادْ بَدِّي عِيشْ بِالْهُجْرانْ

قِرْفانْ مِنْ كِلْمِةْ هَجِرْ.. قِرْفانْ

إِبْنِكْ أَنا.. وْمِشْتاقْ تا شُوفِكْ

عَايِشْ وَحِيد بْغُربْتي ضجْرانْ

مِشْتاقْ إِتْمَرْمَغْ عَلَى كْفُوفِكْ

وْقِلِّكْ: بْحِبِّكْ.. وِالْقَلب فرْحانْ

مشْتاقْ إِرْجَعْ بَوِّسْ حْرُوفِكْ

وْأُوقَفْ عَ باب كْنيسْتِك ندْمانْ

سَاعْدِينِي رِدّْ مَعْرُوفِكْ

وْإِزْرَع تْرابِي بِـ جَبَلْ لُبْنانْ

**