خوري وقندلفت من مجدليا

ـ1ـ

لَمَّا كْبِرْت شْوَيِّه.. عْرِفْت

لَيْش سَمُّوا بَيِّي: قِنْدلَفْتْ

يِعْنِي بْيِخْدُمْ بَيْت الرَّبّْ

وْبَيِّي هَالشَّغْلِه بِيحِبّْ

مِتْواضع..مِتْلُو ما شِفْت

مِتْعَبَّد لِلْعَدْرا كْتِيرْ

لْسَانُو دافي وْقَلْبُو كْبيرْ

وْما سْمِعْتُو وْلا مَرَّه سَبّْ

ـ2ـ

رْفِيق الْخُوري بِيُّوسْ كانْ

رِفْقَه.. بارَكْها الدَّيَّانْ

بِيُّوس الِبْعَيْنِي وْسَرْكيسْ

قدِّيس مْكَعْنَش قدِّيسْ

وْرِبْحُوا الْوَزْنات مْنِ زْمانْ

ـ3ـ

هْنِيَّالُنْ.. ماتُوا أَبْرارْ

شْمُوعُنْ ما بْتِطْفيها الرِّيحْ

بْمِجِدْلَيَّا.. عاشُوا كْبارْ

وْعَنْ دَرْبُنْ مُشْ مُمْكنْ زِيحْ

بِنيتِلُّنْ بِالْقَلْب مْزارْ

تا يِشْبَعْ قَلْبي تِسْبيحْ

**